العهد الملعون
بعد ما قريت الفاتحة لابويا وكنت خلاص علي استعداد اني ارجع البيت….. لمحت ست لابسه اسود بتقرب من قبر وفي ايديها كيس اسود…. الفضول دفعني اني اعرف هتعمل اي… استخبيت ورا قبر ابويا وبصيت… الست بدأت تحفر قدام القبر وحطت الكيس جوه الحفره وردمت عليها ومشيت…… اتأكدت خلاص انها مشيت… قربت وانا مش فاهم حاجه حفرت مكان ما حفرت الست ولقيت الكيس اخدته وفتحته بمجرد ما فتحت الكيس وشوفت الي جواه حسيت بايد طبقت علي رقبتي ونفسي مش عارف اخده وصدري وجعني وشوفته كائن شيطاني بشع دميم وقال اللعنة علي من نقد العهد…. اللعنة علي من نقد العهد
الجزء الاول
الفضول حاجه ممكن تدمر حياتك حرفيا وتقلبها لجحيم… انا اسمي سعيد منصور عندي 29 سنه من مواليد محافظة سوهاج لكني عايش في القاهرة لظروف شغلي ومتجوز فريده وهي بنت عمي في نفس الوقت…. ابويا توفاه الله من زمان اما امي فهي عايشه معانا… عندنا بنت اسمها سلمي خمس سنين وانا كنت شغال في شركه دعايا كبيره…. تقدروا تفهموا من الي هحكيه حجم الرعب الي بعيشوا…… وهرحع ليكم باليوم الاسوء في حياتي لما فتحت الكيس قدام القبر والي كان جواه صوره بنت وتقريبا كانت من فرح ومغروز في الصوره دبابيس كتير ومكتوب علي الصوره بدم متجلط… سرطان.. تفرقه.. دمور عقلي.. موت… وكان فيه شعر في الكيس وريحه الكيس لا تطاق بمجرد ما شوفت الحاجه دي.. ايد طبقت علي رقبتي ومكنتش عارف اتنفس او حتي اتكلم لساني اتعقد وشوفت كائن شيطاني بشع دميم اسود اصلع سنانه اشبه بدبابيس عينيه بلون الدم ايديه كلها حوافر… وقلي بصوت غليظ اللعنة على من نقد العهد….. حسيت الدنيا بتدور بيا واني بفقد الوعي تدريجي.. لما فوقت لقيت نفسي في اوضه صغيرة والي عرفته انها اوضه عبد التواب التربي والي كان بيحاول يفوقني من حاله التوهان الي كنت فيها… وسألني حصل ايه … جيت اتكلم لقيت الكلام بيخرج مني بالعافيه وافتكرت اللحظه الي لساني اتعقد فيها.. فضلت اعيط علي حالي… وخرجت من عند التربي عشان ارجع البيت بس هقولهم اي خرجت فوني لقيت مكالمات فائته كتير من امي ومراتي… اتحركت ناحيه القبر ولقيت الكيس مكانه اخدته وانا مقرر اني لازم افهم الحكايه….. رجعت البيت وانا في حاله صعبه جدا مش عارف اقول اي لاهلي امي ومراتي وبنتي… اول ما شافوني جريوا عليا والاسئله المعتاده الي في الحالات دي كنت فين وحصل اي…. مش عارف ارد عليهم هقول اي هخليهم يشوفوا الي انا فيه….. رديت عليهم بصعوبه انفجروا من العياط علي حالي… اخدتهم في حضني وبعد شويه هديت وقلولي قول الحمدلله…. دخلت انام تعبان وخايف وحاولت رغم الخوف انام نمت بعد مجهود من المحاولات.. وحلمت حلم غريب… حلمت اني واقف في فرح بس محدش شايفني كنت شفاف الناس كانت فرحانه وبترقص وفجأه دخلت بنت القاعه ومسكت الميك وبدأت تقول كلام مش كويس علي العروسه وانها خطفت منها خطيبها واتجوزتوا…. العريس قام وضربها بالقلم علي وشها وطردها بره الفرح….. المشهد اتبدل وشوفت ست ايوه هي نفس الست الي كانت في المقابر وكانت ماسكه صوره البنت العروسه وبتعيط وجابت شعر ومسكت قطه سوده ودبحتها وصفت دمها علي الشعر وهي بتقول بحق ملوك الجن الاربعه وبحق العهود الاربعه طارش وظام وعزازيل وعصود توكلوا اتوانا مسرعين مسرعين وتوكلوا علي من امركم الاسياد به… ومسكت الصوره وبدم القط كتبت علي صوره سرطان. تفرقه. دمور عقلي. موت وكنبت حروف كتير ومسكت دبابيس سوده وغرزتها في الصوره… الاوضه اتملت صرخات… حطت كل حاجه في كيس اسود ودفنتها في المقابر وشوفت نفس المشهد تاني…. قومت من النوم وانا مش فاهم حاجه… مين الست دي واي دخل الفرح والبنت الي اتكلمت فيه….. قومت وغسلت وشي وجهزت نفسي عشان اروح الشغل ولما الناس عرفت الي حصلي كلهم بصولي بنظره شفقه وكأني صعبان عليهم…. ولقيت المدير بيطلبني وبيبلغني انهم استغنوا عن خدماتي كانت صدمه كبيره ليا ومكنتش مصدق…. دخلت في مود اكتئاب عزلت نفسي عن العالم كله قفلت اوضتي عليا حياتي كلها عباره عن نوم وكوابيس مش مفهومه ومكنتش عايز اكلم حد لكن واضح انه مكتوب عليا فعلاً اني ادفع تمن فضولي…. في يوم كنت نايم وصحيت علي صوت بنتي سلمي بتعيط…. قومت وخرجت من الاوضه بحذر لقيتها واقفه قدام الحمام وبتكلم حد جوه…. قولتلها بتكلمي مين…. حركت دماغها ناحيتي وسمعت صوت عضم رقبتها بيتكسر وعينيها كانت بيضه تماما…. دي مش بنتي دي شيطانه اعوذ بالله من الشيطان الرجيم… صرخت واختفت ودخلت اوضه سلمي لقيت سلمي نايمه غطيتها وخرجت وسمعت صوت في ودني بيقول اللعنة على من نقد العهد… الصوت كان بيخترق عقلي….. وقررت اني لازم افهم علي الاقل يمكن اعرف اتخلص من الي انا فيه….. تاني يوم اخدت العربيه وروحت المقابر عند عبد التواب التربي عشان لازم افهم لما وصلت كان الوقت المغربيه كده خبطت الراجل فتح واول ما شافني قالي انت كويس دلوقتي يبني هزيت دماغي بمعني ايوه وبدأت احكيله كل الي حصل كان بيسمعني وبعدين قالي وانا اي المطلوب مني… رديت عليه وقولتله انا عايز افهم حكايه القبر ده…. وكأنه ركبه مليون عفريت.. لقيته برق وقالي امشي وملكش دعوه… مسكته من هدومه وقولتله يبقي انت عارف كل حاجه اتكلم بدل ما اقتلك عيط وقالي انا مش عايز مشاكل انا مش قدهم… قولتله هما مين… قالي وكان كلامه اشبه بالرصاص لانه قال
انا غلطان واستاهل كل الي بيحصلي… لكن بلاش انت تعرف الحقيقة
صدقني هتتأذي…. ضحكت وقولتله هتأذي هو فيه اذيه اكتر من الي انا فيها دي… قلي انت مشوفتش حاجه لسه والحقيقه رغم انها صعبه لكنها مرعبه…. بقولك ايه يا راجل انت اتكلم انا مش هتحايل عليك انا لازم افهم في ايه…. الراجل قعد في الارض وقال انا مكنتش هعمل حاجه بس هي اغرتني بالفلوس وخلتني اسيبها تدفن العمل… قولتله هي مين… قلي الست حسنيه…..رديت عليه وقولتله مين الست حسنيه دي…. قلي هحكيلك بس لازم تعرف انك هتفتح علي نفسك ابواب جنهم…. قولتله احكي… قلي…. في يوم كنت قاعد في الاوضه.دخل عليا مسعود ابني وقال ان في ست عاوزاني بره…. خرجت ولقيت فعلا واحده ست لابسه اسود باين عليها الحزن والقهر وانها مش بتنام…. وقلتلي انا عاوزه منك خدمه هتاخد منها فلوس كتير… قولتلها خدمه اي… قلتلي عاوزه ادفن العمل ده قدام قبر…. رديت عليها وقولتلها انتي مجنونه يا ست انتي انا مستحيل اعمل كده…. لكنها خرجت من شنطتها 5الاف جنيه…. اول ما شوفت الفلوس اتجننت… قلتلي شوفت كنت هتاخد كل ده لكن خلاص براحتك…. قولتلها لا استني يا ست انا انا موافق….. وقلتلي اطمن انت كل مهمتك انك متخليش حد يشوفني وانا بدفن العمل ساهله صح….. قولتلها وانا ببلع ريقي بالعافيه طبعا طبعا….. وافقت من غير ما اعرف هي عاوزه تأذي مين…. لكن الصدمه اني عرفت بعد كده ان البنت الي اتأذت تبقي اغلي الناس عليا بنت اختي اسمها سميحه…. خصوصا ان سميحه اطلقت وحالها دلوقتي يصعب علي الكافر…. انا اخدت جزائي وبنت اختي دفعت تمن طمعي….. قولتله انا عايز اشوف سميحه…. قلي ليه…. قولتله انا عندي الحل.. قلي بجد…… رديت عليه ايوه اقدر…… ركبنا عربيتي وبدأ يوصفلي الطريق لكن لقيت نفسي وصلت لبيت في منطقه معزوله… قولتله اي البيت ده انت واخدني علي فين…. قلي ده بيت الشيخ مسعد ده الي بيعالج سميحه….. دخلنا عنده كل الي اقدر اقوله انه دجال.. المهم بدأت احكيله كل حاجه حصلت… كان بيهز دماغه وبعدها قال فين العمل ده… طلعته من جيبه وقولتله اهو… قلي عدوا عليا بكره وانا هتصرف….. خرجنا من عنده وانا مش مطمن قلقان وخايف وصلت البيت دخلت اوضتي من غير ما اتكلم مع حد… ونمت.. وشوفت نفسي وسط المقابر قدام نفس القبر ومن العدم ظهر الشيطان تاني وضحك وقلي متحولش سميحه ملكي محدش هيعرف يخدها مني متحولش…. صحيت علي صوت تليفوني بيرن رديت الو….كان التربي الحقني سميحه بتموت نزلت بسرعه اخدت عربيتي بعد ما قلي علي العنوان…. واتحركت وصلت كان الباب مفتوح وسميحه علي السرير انسانه نحيفه هزيله تحت عينيها اسود وكانت بتصرخ وكانت بتصرخ صرخات لايمكن تكون طالعه من بشر ابدا وخرج من بوقها دم اسود وبعدها فقدت الوعي…. امها فضلت تعيط طمنتها ان بنتها هتكون بخير… وخرجنا بسرعه علي بيت مسعد عشان نشوف هو اتصرف ازاي ولا هبب اي….. لما وصلنا المره دي كانت في ناس متجمعه قدام البيت… والبيت كان عباره عن. كتله من جهنم النار ماسكه البيت من كل حته…. الشرطه وصلت بعد ما البيت بقي كتله من الفحم واقتحموا البيت المفاجأه بقي ان العمل سليم متحرقش اخدته من غير ما حد ياخد باله…. اما جثه مسعد فكانت متفحمه تماما…. خرجنا من عنده واحنا خلاص فاقدين الامل واحنا ماشين عدينا علي جامع وكان يوم جمعه وكان وقت الصلاة وقفنا عشان نصلي دخلنا المسجد وسمعنا الخطبه وصلينا ولقيت نفسي بتلقائيه بقرب من شيخ الجامع والي عرفته بعدين ان اسمه الشيخ صلاح حكتله كل حاجه بس كلامه ليا كان محبط لانه قلي… اوعي تفتكر انك عشان جبت العمل ان الموضوع كده اتحل لا الموضوع صعب خصوصا ان علي حسب كلامك ان الجن اتحكم في جسدها ده جن عاشق يبني ومش سهل خروجه لكن مش مستحيل…. خلصت كلامي معاه وخرجت ووعدني بكره بزياره لبيت سميحه… ركبنا العربية تليفوني رن كان مراتي بتقولي انها هتاخد بنتي وهتسافر البلد عند اهلها يومين وافقت لاني فعلا مقصر في حقهم…. رجعت البيت لقيت امي اتغديت معاها ودخلت انام نمت نوم عميق لكن مينفعش انام من غير كوابيس…. شوفت نفسي واقف جوه حمام وبغسل راسي تحت الميه… ورفعت وشي للمرايا… لكن انعكاسي كان نفس الكائن تاني وقلي ده اخر تحذير ليك ابعد عن سميحه ملكش علاقه بالموضوع والا انتقامي منك هيكون صعب مش هتتحمله…. صحيت من النوم خايف وقلقان حاسس بصداع هيفرتك دماغي… اتصل بيا الشيخ صلاح وقلي انا مستنيك عشان نروح للبيت… نزلت اخدت عربيتي ومن غير تفكير…. ومهمنيش تحذير الجن ليا ووصلنا لبيت سميحه… واول ما شافت الشيخ صرخت وجريت علي اوضتها…دخلت الاوضه وكتفناها والشيخ بدأ يقول وهو ماسك راسها وضاغط عليها بسم الله الذي لا يضر مع اسمه شيء في الأرض ولا في السماء وهو السميع العليم
اعوذ بكلمات الله التامات من شر ما خلق بسم الله ارقيكي من كل شيء يأذيكي….. يا من الجمت كل متمرد سلم يارب سلم…. وبعد الايات من القرأن الكريم كانت سميحه بتصرخ وبتتلوي وفجأه عينيها بقيت كلها سوده وبصتلي بصه كلها غضب… وبعدها بوقها اتفتح على الاخر وخرج منه دخان اسود كثيف ووقعت سميحه علي السرير وفقدت الوعي…… الشيخ كان عرقان جدا وقال الحمدلله خرج…. طلعنا ووصلت الشيخ لبيته وبعدها اتحركت علي بيتي… لكن في المرايا بتاعت العربيه شوفته كان قاعد في الكنبه الي ورا وقلي انا حذرتك وانت مسمعتش الكلام استحمل نتيجه ده….. لقيت خبط علي الازاز وامين شرطه بيقولي انت نايم في الاشاره قوم يا استاذ كمل عشان الناس عاوزه تمشي…. يعني انا كنت بحلم مشيت وانا في الطربق جالي تليفون رديت الو… استاذ سعيد.. ايوه مين انا عندي ليك خبر حاول تستحمله وكانت الصدمه…
تفتكروا اي الخبر الي عرفه سعيد حاولوا تتوقعوا بقيه الأحداث …انتظروني في الجزء التاني
محمود الامين
العهد الملعون
الجزء الثاني والاخير
تليفوني رن رديت الو.. رد عليا واحد وقلي استاذ سعيد… قولتله ايوه مين…. رد عليا وقلي انا عندي ليك خبر مش عارف اقولهولك ازاي…. قولتله انت مين الاول وخبر اي انا مش فاهم حاجه…. قلي استاذ سعيد انا مش عارف اقولك اي بس احنا هنا المستشفى مراتك وبنتك……. البقاء لله….. انت بتقول ايه يا بني ادم انت انا مراتي عايشه وبنتي عايشه انت مجنون اكيد قلي انك بتكدب او بتشتغلني…. رد عليا وقلي انا مقدر موقفك والي انت فيه بس بعد اذنك ياريت تجي المشرحه عشان تتعرف علي الجثث….. كنت حاسس اني مشلول وانا بسمع ده ومش مصدق حاسس انا الارض هتتشق وتبلعني…. لبست ونزلت بالعافية ومرضتش ابلغ امي حاجه… ركبت العربيه الدنيا سوده قدامي مش عارف اصدق اتحركت وانا سرحان لحد ما لقيت نفسي قدام المستشفى نزلت من العربيه ودخلت المستشفى… روحت الاستقبال وسألت وكان الرد انهم في المشرحه مشيت علي المشرحه حاسس انى راجل عنده مليون سنه مش قادر امشي ووصلت للمشرحه…. وقابلني هناك الشخص الي اتصل بيا وكان واقف جمبه شخص تاني اسمه مؤمن…. والي عرفته انه هو الي نقلهم المستشفى….دخلت لقيت جثتين قدامي المنظر رهيب مقبض محدش يقدر يتخيله ابدا قولتله اكشف الغطا… وكشفه المنظر صعب صرخت بعلوا صوتي فريده.. سلمي لا قوموا انتوا لسه عايشين ده كابوس وهفوق منه دلوقتي يلا قوموا…. كتفوني وطلعوني بره جالي انهيار عصبي وكنت حاسس اني هموت حاسس ان روحي خلاص هتطلع…. ادوني حقنه مهدئه خلتني انام….. وحلمت بيه ايوه الشيطان الي مش راضي يسبني اعيش كان واقف قدام القبر وقلي لسه هنتقم منك كمان لسه انتقامي منك منتهاش وهرجع اخد سميحه تاني هرجع تاني…. وضحك وفي لحظه جسمه مسكت فيه النار…. صحيت وكنت فاكر اني هصحي هلاقيهم لكن خلاص ده بقي واقع…. لكني لما صحيت لقيت مؤمن قدامي وقلي حمدالله على السلامة… وقعد جمبي سألته هي الحادثه حصلت ازاي ….. بص في الارض وقلي مكنتش حادثه عاديه ابدا.. سألته يعني اي… قلي انا بشتغل في كافتريا علي الطريق وقدامي في استراحه العربيات بتريح فيها شويه عشان السفر المهم ان عم عادل السواق وصل بزوجه وبنت حضرتك قدام الاستراحة ونزل يشرب كوبايه شاي… وحصل الي اغرب من الخيال العربيه دارت وطلعت لوحدها عم عادل افتكر انه حرامي واخر حاجه سمعناها صرخات مراتك جوه العربيه وبعدها العربيه اتقلبت… جرينا عليها لكن العربيه مكنش فيها سواق…… كنت بسمع كلام مؤمن وانا مش مستغرب خالص لاني عارف من الي عمل كده….. خرجت من المستشفى عشان ادفن مراتي وبنتي عشان ادفن حياتي عشان خلاص انا بقيت ميت انا نفسي اكون معاهم بس الاول لازم اجيب حقهم…. دفنتهم بايدي والناس حواليا بتبكي قومني الشيخ صلاح وقالي شد حيلك يبني…. قولتله حقهم لازم اجيب حقهم…. قالي مش وقته الكلام ده…. قولتله لا وقته هجيب حقهم…. اخدني بعيد عن الناس الي بدأت تتفرج عليا وانا بتكلم وتقول اتجنن خلاص…. وقالي عايز تاخد حقهم من مين…. من غير تفكير من الي عملت السحر ده حسنيه هي السبب هقتلها…. ركبت العربيه وجري ورايا الشيخ صلاح وهو بيقولي استني يبني وركب جمبي وطلعت علي بيت سميحه والي كانت كويسه جدا وخفت… وعرفت منها عنوان حسنيه…. ركبت العربيه ومعايا الشيخ صلاح واتحركنا…. وصلت لقريه وفضلت اسأل لحد ما وصلت قدام بيت وفيه عزا قدامه كبير ولما سألت مين مات قلولي الست حسنيه…. صرخت وقولتلهم ماتت ازاي قبل ما انتقم منها… الناس كانت هتضربني لكن ابنها شريف ادخل وقال حضرتك استاذ سعيد صح… قولتله ايوه…. قلي تعالي معايا…. رحنا البيت عنده وقعد قدامنا وقلي امي انتحرت…. سألته بعد ما دمرت حياتي صح ماتت بعد ما فقدت اغلي الناس عليا بسببها… قلي هيا سيبالك الجواب ده… فتحت الجواب وانا مش فاهم حاجه وابتديت اقري… نص الجواب( استاذ سعيد لما تقري الجواب ده هكون ميته مكنش عندي الشجاعة اني اشوفك وواجهك ولا قادره اعيش بعذاب الضمير…. انت اتظلمت الحكايه بتبدأ لما شاب اسمه حسين اتقدم لبنتي نور كانوا مع بعض في الجامعه وبيحبوا بعض واحنا وافقنا واتخطبوا…. لكن بعد فتره بدأت تظهر مشاكل كتير ما بينهم كانوا بيتخانقوا علي اتفه الاسباب…. لكنها وصلت لفسخ الخطوبه… وبعدها عرفنا ان حسين خطب بنت اسمها سميحه وفرحهم بعد شهر دخلت نور بنتي في حاله اكتئاب لانها كانت بتحبه… وعرفت معاد الفرح وراحت يومها وعملت فضيحه وضربها حسين وطردها كانت منهاره وهيا بتعدي الطريق عربيه خبطتهاوماتت. نار الانتقام عمتني وخلتني عملتلهم سحر اسود وعهد مع شيطان عشان تتلبس من جن عاشق وفعلا طلقها حسين…. لكن بعدين عرفت الي حصلك بسبب فضولك وبسببي… انا ندمت علي الي عملته لكن ندمي قدام عذاب الضمير مكنش كافي قررت انتحر عشان مش عارفه اعيش تاني بس بطلب منك تسمحني ارجوك سمحني
قفلت الجواب وانا بقول اسامح مين اسامح نفسي الاول وبعدين اسامح الكل… رجعت بيتي قعدت مع امي… وجالي الشيخ صلاح وقالي شوفت حاجه تاني قولتله لا اللعنه انتهت وانتهي العهد الملعون…
تمت
